jab the kam-umr samajhdar nahin hote the

jab the kam-umr samajhdār nahīñ hote the

un dinoñ log adākār nahīñ hote the

ab to vo log bhī milne ko chale aate haiñ

baat karne ko jo tayyār nahīñ hote the

kuchh gharoñ meñ koī rahtā hī nahīñ thā afsos

kuchh gharoñ ke dar-o-dīvār nahīñ hote the

baat karne meñ koī ḳhauf nahīñ hotā thā

log yuuñ milne se bīmār nahīñ hote the

is tarah fat.h kiye kitne ilāqe ham ne

jang ke vāste hathiyār nahīñ hote the

yuuñ na ho aañkh khule aur bichhaḌ jaa.eñ ham

bas isī ḳhauf se bedār nahīñ hote the

jin dinoñ ḳhvāb luTātī thiiñ ye āñkheñ 'ārib'

un dinoñ itne ḳharīdār nahīñ hote the

jab the kam-umr samajhdar nahin hote the

un dinon log adakar nahin hote the

ab to wo log bhi milne ko chale aate hain

baat karne ko jo tayyar nahin hote the

kuchh gharon mein koi rahta hi nahin tha afsos

kuchh gharon ke dar-o-diwar nahin hote the

baat karne mein koi KHauf nahin hota tha

log yun milne se bimar nahin hote the

is tarah fath kiye kitne ilaqe hum ne

jang ke waste hathiyar nahin hote the

yun na ho aankh khule aur bichhaD jaen hum

bas isi KHauf se bedar nahin hote the

jin dinon KHwab luTati thin ye aankhen 'arib'

un dinon itne KHaridar nahin hote the