jab tujhe milne ki tadbir nai hoti hai

jab tujhe milne kī tadbīr na.ī hotī hai

sūrat-e-gardish-e-taqdīr na.ī hotī hai

munhadim hotā huuñ har aan pas-e-harf-e-kuhan

tab kahīñ sher kī ta.abīr na.ī hotī hai

kaise lauTā maiñ tire dast-e-zamāna-gar meñ

tere chhūne se to tasvīr na.ī hotī hai

vaqt de jaa.e jise yaad purānī koī

roz us harf kī tāsīr na.ī hotī hai

ik ajab kaif meñ chaltā huuñ sar-e-dasht-e-balā

jab mire paañv meñ zanjīr na.ī hotī hai

ham badalte nahīñ 'armān' kabhī jāh-o-hasham

haañ isī ḳhvāb kī ta.abīr na.ī hotī hai

jab tujhe milne ki tadbir nai hoti hai

surat-e-gardish-e-taqdir nai hoti hai

munhadim hota hun har aan pas-e-harf-e-kuhan

tab kahin sher ki tabir nai hoti hai

kaise lauTa main tere dast-e-zamana-gar mein

tere chhune se to taswir nai hoti hai

waqt de jae jise yaad purani koi

roz us harf ki tasir nai hoti hai

ek ajab kaif mein chalta hun sar-e-dasht-e-bala

jab mere panw mein zanjir nai hoti hai

hum badalte nahin 'arman' kabhi jah-o-hasham

han isi KHwab ki tabir nai hoti hai