jab tumhaare KHat ko maine nazr-e-atish kar diya

jab tumhāre ḳhat ko maiñ ne nazr-e-ātish kar diyā

ek ik lafz-e-vafā ne duur tak pīchhā kiyā

āḳhirī tahrīr thī un kī ye maiñ ne kyā kiyā

ḳhud bhī tanhā ho gayā un ko bhī tanhā kar diyā

jaane kis rau meñ tumhārā naam lab par aa gayā

shahr vāloñ ne bas itnī baat par rusvā kiyā

dil meñ rah jā.eñgī kitnī an-kahī bāteñ magar

vaqt saare zaḳhm bhar de gā ye tum ne kyā kahā

rabt-e-dil kā TūTnā āsāñ nahīñ itnā abhī

dāman-e-ehsās hai hālāt se uljhā huā

kitne taare raat kī āñkhoñ se TuuTe haiñ magar

merī palkoñ par hai ik taarā abhī Thahrā huā

haal kī tanhā.iyoñ meñ yuuñ bhī yaad ā.eñge aap

nashtar-e-māzī mire pahlū meñ hai utrā huā

ai mire monis mire hamdam rafīq-e-āshnā

jab tak apnī yaad baaqī hai tujhe bhūlūñgā kyā

ham ne jis misre pe 'nayyar' ḳhatm kī apnī ġhazal

har dil-e-dard-āshnā mahfil meñ nam-dīda huā

jab tumhaare KHat ko main ne nazr-e-atish kar diya

ek ek lafz-e-wafa ne dur tak pichha kiya

aaKHiri tahrir thi un ki ye main ne kya kiya

KHud bhi tanha ho gaya un ko bhi tanha kar diya

jaane kis rau mein tumhaara nam lab par aa gaya

shahr walon ne bas itni baat par ruswa kiya

dil mein rah jaengi kitni an-kahi baaten magar

waqt sare zaKHm bhar de ga ye tum ne kya kaha

rabt-e-dil ka TuTna aasan nahin itna abhi

daman-e-ehsas hai haalat se uljha hua

kitne tare raat ki aankhon se TuTe hain magar

meri palkon par hai ek tara abhi Thahra hua

haal ki tanhaiyon mein yun bhi yaad aaenge aap

nashtar-e-mazi mere pahlu mein hai utra hua

ai mere monis mere hamdam rafiq-e-ashna

jab tak apni yaad baqi hai tujhe bhulunga kya

hum ne jis misre pe 'nayyar' KHatm ki apni ghazal

har dil-e-dard-ashna mahfil mein nam-dida hua