jab un ke pa-e-naz ki Thokar mein aaega

jab un ke pā-e-nāz kī Thokar meñ aa.egā

kitnā ġhurūr raah ke patthar meñ aa.egā

saudā-e-ishq kahte haiñ ahl-e-ḳhirad jise

kyā jaane kab ye vasf mire sar meñ aa.egā

aisī jagah makān banānā na thā mujhe

jañgal tamām uḌ ke mire ghar meñ aa.egā

mujh se nikal ke jā.egā qātil mirā kahāñ

ik din to mere sāmne mahshar meñ aa.egā

ham ḳhud hī kyuuñ na kar leñ sitam jān-e-zār par

kyā is se farq shān-e-sitamgar meñ aa.egā

saare hī āb-o-gil ke safar maiñ ne kar liye

ab āsmān bhī mirī Thokar meñ aa.egā

mausūm hai jo zahr-e-halāhal ke naam se

ab vo mire nasīb ke sāġhar meñ aa.egā

ye kyā ḳhabar thī 'ramz' ki āzād hone par

sailāb-e-ḳhūñ umaD ke har ik ghar meñ aa.egā

jab un ke pa-e-naz ki Thokar mein aaega

kitna ghurur rah ke patthar mein aaega

sauda-e-ishq kahte hain ahl-e-KHirad jise

kya jaane kab ye wasf mere sar mein aaega

aisi jagah makan banana na tha mujhe

jangal tamam uD ke mere ghar mein aaega

mujh se nikal ke jaega qatil mera kahan

ek din to mere samne mahshar mein aaega

hum KHud hi kyun na kar len sitam jaan-e-zar par

kya is se farq shan-e-sitamgar mein aaega

sare hi aab-o-gil ke safar main ne kar liye

ab aasman bhi meri Thokar mein aaega

mausum hai jo zahr-e-halahal ke nam se

ab wo mere nasib ke saghar mein aaega

ye kya KHabar thi 'ramz' ki aazad hone par

sailab-e-KHun umaD ke har ek ghar mein aaega