jab usne aane ka ek din idhar irada kiya

jab us ne aane kā ik din idhar irāda kiyā

to maiñ ne dil kā makāñ aur bhī kushāda kiyā

mire mizāj se miltā nahīñ thā merā libās

to taar taar yahī soch kar libāda kiyā

na thā jo jiit kā imkāñ to sulh kar lī hai

yuuñ pichhlī haar se is baar istifāda kiyā

vo ek shaḳhs jo mujh se gurez-pā hai bahut

gumāñ hai pyaar bhī mujh se usī ne zyāda kiyā

ajab ki arz-e-tamannā ke pech-o-ḳham na khule

'shahāb' husn-e-talab ko hazār saada kiyā

jab us ne aane ka ek din idhar irada kiya

to main ne dil ka makan aur bhi kushada kiya

mere mizaj se milta nahin tha mera libas

to tar tar yahi soch kar libaada kiya

na tha jo jit ka imkan to sulh kar li hai

yun pichhli haar se is bar istifada kiya

wo ek shaKHs jo mujh se gurez-pa hai bahut

guman hai pyar bhi mujh se usi ne zyaada kiya

ajab ki arz-e-tamanna ke pech-o-KHam na khule

'shahab' husn-e-talab ko hazar sada kiya