jab us se tark-e-mulaqat ka irada kiya

jab us se tark-e-mulāqāt kā irāda kiyā

tab us ne dāman-e-dil ko zarā kushāda kiyā

bas ik nigāh se us kī sadā rahe maḳhmūr

kabhī na jaam uThāyā na shaġhl-e-bāda kiyā

fareb de ke bhī us kā qusūr kam hī rahā

ki ham ne us pe bharosa bhī kuchh ziyāda kiyā

sharāfat aur najābat kā is ko ġharra hai

hasab nasab se sivā zikr-e-ḳhānvāda kiyā

jahān-e-sher-o-adab meñ hamārā zikr bhī hai

ki ham ne 'mīr' se 'ġhālib' se istifāda kiyā

mirī ġhayūr tabī.at pe us ko hairat hai

ki arz-e-shauq kā us se na phir i.aada kiyā

ye aur baat ki nākāmiyāñ muqaddar thiiñ

'habāb' jo bhī kiyā ham ne bil-irāda kiyā

jab us se tark-e-mulaqat ka irada kiya

tab us ne daman-e-dil ko zara kushada kiya

bas ek nigah se us ki sada rahe maKHmur

kabhi na jam uThaya na shaghl-e-baada kiya

fareb de ke bhi us ka qusur kam hi raha

ki hum ne us pe bharosa bhi kuchh ziyaada kiya

sharafat aur najabat ka is ko gharra hai

hasab nasab se siwa zikr-e-KHanwada kiya

jahan-e-sher-o-adab mein hamara zikr bhi hai

ki hum ne 'mir' se 'ghaalib' se istifada kiya

meri ghayur tabiat pe us ko hairat hai

ki arz-e-shauq ka us se na phir iada kiya

ye aur baat ki nakaamiyan muqaddar thin

'habab' jo bhi kiya hum ne bil-irada kiya