jab wo pasheman nazar aae hain

jab vo pashemān nazar aa.e haiñ

maut ke sāmān nazar aa.e haiñ

ho na ho ab aa ga.ī manzil qarīb

rāste sunsān nazar aa.e haiñ

'ishq meñ sahme hue do āshnā

muddatoñ anjān nazar aa.e haiñ

kī hai jo fikr apne garebān kī

laakh garebān nazar aa.e haiñ

khā na sake zindagī bhar jo fareb

aise bhī nādān nazar aa.e haiñ

hosh jab aaya tire jaane ke baa'd

ghar meñ bayābān nazar aa.e haiñ

'ishq meñ kuchh ham hī pareshāñ nahīñ

vo bhī pareshān nazar aa.e haiñ

haa.e re vo madh-bharī āñkheñ 'ḳhumār'

mai-kade vīrān nazar aa.e haiñ

jab wo pasheman nazar aae hain

maut ke saman nazar aae hain

ho na ho ab aa gai manzil qarib

raste sunsan nazar aae hain

'ishq mein sahme hue do aashna

muddaton anjaan nazar aae hain

ki hai jo fikr apne gareban ki

lakh gareban nazar aae hain

kha na sake zindagi bhar jo fareb

aise bhi nadan nazar aae hain

hosh jab aaya tere jaane ke ba'd

ghar mein bayaban nazar aae hain

'ishq mein kuchh hum hi pareshan nahin

wo bhi pareshan nazar aae hain

hae re wo madh-bhari aankhen 'KHumar'

mai-kade viran nazar aae hain