jabin-e-sang pe likkha mera fasana gaya

jabīn-e-sañg pe likkhā mirā fasāna gayā

maiñ rahguzar thā mujhe rauñd kar zamāna gayā

naqāb oḌh ke aa.e the raat ke qazzāq

pighaltī shaam se sab dhuup kā ḳhazāna gayā

kise ḳhabar vo ravāna bhī ho sakā ki nahīñ

tumhāre shahr se jab us kā āb-o-dāna gayā

vo chal diyā to nigāhoñ se ki diloñ se ġhurūr

laboñ se zahr havāoñ se tāziyāna gayā

ye jāntā huuñ ki tū ne liyā thā rok use

magar vo ātishīñ aañsū mujhe jalā na gayā

maiñ ek Doltā sāgar mujhe uThātā kaun

ghaTā uThā ke chalī thī magar chalā na gayā

kahāñ gayā maiñ bichhaḌ kar kise ḳhabar hogī

jo ek baar yahāñ se huā ravāna gayā

jabin-e-sang pe likkha mera fasana gaya

main rahguzar tha mujhe raund kar zamana gaya

naqab oDh ke aae the raat ke qazzaq

pighalti sham se sab dhup ka KHazana gaya

kise KHabar wo rawana bhi ho saka ki nahin

tumhaare shahr se jab us ka aab-o-dana gaya

wo chal diya to nigahon se ki dilon se ghurur

labon se zahr hawaon se taziyana gaya

ye jaanta hun ki tu ne liya tha rok use

magar wo aatishin aansu mujhe jala na gaya

main ek Dolta sagar mujhe uThata kaun

ghaTa uTha ke chali thi magar chala na gaya

kahan gaya main bichhaD kar kise KHabar hogi

jo ek bar yahan se hua rawana gaya