jabin-e-shauq ko kuchh aur bhi izn-e-saadat de

jabīn-e-shauq ko kuchh aur bhī izn-e-sa.ādat de

ki zauq-e-zindagī mahdūd sañg-e-āstāñ tak hai

naved-e-rustagārī par abas dil-shād hotā hai

abhī sad daam ai bulbul-e-qafas se āshiyāñ tak hai

ye ehsās-e-ta.alluq mujh ko miTne bhī nahīñ detā

ki terī dāstāñ kā rabt merī dāstāñ tak hai

tarāna chheḌ vo mutrib ki rūh-e-ishq chauñk uTThe

ḳharosh-e-nāla-e-ġham kyā jo soz-e-jism-o-jāñ tak hai

sarāpā aarzū ban kar kamāl-e-mudda.ā ho jā

vo nañg-e-ishq hai jo aarzū āh-o-fuġhāñ tak hai

zamāna chāhiye takmīl-e-zauq-e-lazzat-e-ġham ko

abhī duniyā-e-dil mahdūd zikr-e-īñ-o-āñ tak hai

bayābān-e-mohabbat kī navāzish pūchhnā kyā hai

ummīd-o-bīm kī hālat faqat sūd-o-ziyāñ tak hai

kahāñ se lā.egī duniyā hamārī himmateñ 'āsī'

mohabbat meñ qadam apnā faqat kaun-o-makāñ tak hai

jabin-e-shauq ko kuchh aur bhi izn-e-saadat de

ki zauq-e-zindagi mahdud sang-e-astan tak hai

nawed-e-rustagari par abas dil-shad hota hai

abhi sad dam ai bulbul-e-qafas se aashiyan tak hai

ye ehsas-e-talluq mujh ko miTne bhi nahin deta

ki teri dastan ka rabt meri dastan tak hai

tarana chheD wo mutrib ki ruh-e-ishq chaunk uTThe

KHarosh-e-nala-e-gham kya jo soz-e-jism-o-jaan tak hai

sarapa aarzu ban kar kamal-e-muddaa ho ja

wo nang-e-ishq hai jo aarzu aah-o-fughan tak hai

zamana chahiye takmil-e-zauq-e-lazzat-e-gham ko

abhi duniya-e-dil mahdud zikr-e-in-o-an tak hai

bayaban-e-mohabbat ki nawazish puchhna kya hai

ummid-o-bim ki haalat faqat sud-o-ziyan tak hai

kahan se laegi duniya hamari himmaten 'asi'

mohabbat mein qadam apna faqat kaun-o-makan tak hai