jabin se naKHun-e-pa tak dikhai kyun nahin deta

jabīñ se nāḳhun-e-pā tak dikhā.ī kyuuñ nahīñ detā

vo ā.īna hai to apnī safā.ī kyuuñ nahīñ detā

dikhā.ī de rahe haiñ sāmne vāloñ ke hilte lab

magar vo kah rahe haiñ kyā sunā.ī kyuuñ nahīñ detā

samundar bhī tirī āñkhoñ meñ sahrā kī tarah gum hai

yahāñ vo tañgī-e-jā kī duhā.ī kyuuñ nahīñ detā

jab us ne toḌ dī zanjīr dīvāreñ girā dī haiñ

asīrī ke tasavvur se rihā.ī kyuuñ nahīñ detā

vo ḳhud se baḳhsh detā hai jahān-e-āb-o-gil mujh ko

talab ke bāvajūd āḳhir gadā.ī kyuuñ nahīñ detā

ab āñkhoñ se nahīñ hāthoñ se chhūnā chāhtā huuñ

mujhe vo vasl-āmeza judā.ī kyuuñ nahīñ detā

'zubair' ik baar uñglī bhī nahīñ chhūne ko miltī hai

vo apne hasht-pahlū meñ rasā.ī kyuuñ nahīñ detā

jabin se naKHun-e-pa tak dikhai kyun nahin deta

wo aaina hai to apni safai kyun nahin deta

dikhai de rahe hain samne walon ke hilte lab

magar wo kah rahe hain kya sunai kyun nahin deta

samundar bhi teri aankhon mein sahra ki tarah gum hai

yahan wo tangi-e-ja ki duhai kyun nahin deta

jab us ne toD di zanjir diwaren gira di hain

asiri ke tasawwur se rihai kyun nahin deta

wo KHud se baKHsh deta hai jahan-e-ab-o-gil mujh ko

talab ke bawajud aaKHir gadai kyun nahin deta

ab aankhon se nahin hathon se chhuna chahta hun

mujhe wo wasl-ameza judai kyun nahin deta

'zubair' ek bar ungli bhi nahin chhune ko milti hai

wo apne hasht-pahlu mein rasai kyun nahin deta