jacha na kuchh bhi nigahon ko muntaha ke siwa

jachā na kuchh bhī nigāhoñ ko muntahā ke sivā

jhukā ye sar na kahīñ un ke naqsh-e-pā ke sivā

hazār minnateñ kiiñ laakh haath phailā.e

milā na kuchh bhī magar zaḳhm-e-iltijā ke sivā

sivā.e us ke nahīñ aur kuchh bhī paas mire

tujhe maiñ duuñ bhī to kyā dost ab duā ke sivā

yahī havas hai ki saarā jahāñ ho zer-e-nagīñ

jahāñ meñ kuchh bhī nahīñ aur is havā ke sivā

ḳhulūs shart hai avval bhī aur āḳhir bhī

dayār-e-ishq meñ sab hech hai vafā ke sivā

laboñ pe harf-e-vafā hai diloñ meñ bair magar

kahūñ maiñ kyā use yāroñ kī ik adā ke sivā

aziiz kyuuñ na ho ai 'chāñd' mujh ko ye daulat

bachā bhī kyā hai mire paas ab anā ke sivā

jacha na kuchh bhi nigahon ko muntaha ke siwa

jhuka ye sar na kahin un ke naqsh-e-pa ke siwa

hazar minnaten kin lakh hath phailae

mila na kuchh bhi magar zaKHm-e-iltija ke siwa

siwae us ke nahin aur kuchh bhi pas mere

tujhe main dun bhi to kya dost ab dua ke siwa

yahi hawas hai ki sara jahan ho zer-e-nagin

jahan mein kuchh bhi nahin aur is hawa ke siwa

KHulus shart hai awwal bhi aur aaKHir bhi

dayar-e-ishq mein sab hech hai wafa ke siwa

labon pe harf-e-wafa hai dilon mein bair magar

kahun main kya use yaron ki ek ada ke siwa

aziz kyun na ho ai 'chand' mujh ko ye daulat

bacha bhi kya hai mere pas ab ana ke siwa