jaDon se apni juda hua hai

jaḌoñ se apnī judā huā hai

musībatoñ meñ ghirā huā hai

taraqqī tahzīb 'asr-e-hāzir

ki insāñ haivāñ banā huā hai

faqat dikhāyā thā aa.ina hī

isī pe qaa.id ḳhafā huā hai

talāsh qātil kī karne vaalo

tumhīñ meñ qātil chhupā huā hai

chaTā.ī par bhī thā koī rahbar

ye qissa goyā sunā huā hai

vafā kā jis ne kiyā thā vā'da

vo dushman-e-jāñ banā huā hai

hamāre 'ahd-e-vafā kā qissa

vo āb-e-zar se likhā huā hai

vahāñ sañbhal kar 'rafīq' chalnā

jahāñ pe kāñTā bichhā huā hai

jaDon se apni juda hua hai

musibaton mein ghira hua hai

taraqqi tahzib 'asr-e-hazir

ki insan haiwan bana hua hai

faqat dikhaya tha aaina hi

isi pe qaid KHafa hua hai

talash qatil ki karne walo

tumhin mein qatil chhupa hua hai

chaTai par bhi tha koi rahbar

ye qissa goya suna hua hai

wafa ka jis ne kiya tha wa'da

wo dushman-e-jaan bana hua hai

hamare 'ahd-e-wafa ka qissa

wo aab-e-zar se likha hua hai

wahan sanbhal kar 'rafiq' chalna

jahan pe kanTa bichha hua hai