jafa wo karte rahe aise bewafa ki tarah

jafā vo karte rahe aise bevafā kī tarah

gila bhī kar na sakā maiñ kabhī gila kī tarah

vo sang-dil hai sitamgar hai be-muravvat hai

jo ġham kā haal sune sirf vāqi.a kī tarah

kisī ke bachne kā imkāñ nazar nahīñ aatā

fazā meñ zahr hai phailā huā havā kī tarah

maiñ shāyad uub chukā huuñ hayāt se apnī

mujhe hayāt bhī lagtī hai ab qazā kī tarah

kisī ko Das leñ to paanī na pī sake yaaro

haiñ aise log yahāñ naag devtā kī tarah

vo apnā jurm chhupāne ko shimr ban baiThe

hamārā shahr bhī lagtā hai karbalā kī tarah

tumhārā husn-o-shabāb in dinoñ ma.āz-allāh

nazar jamā.ūñ to chhāne lage nasha kī tarah

chaman ko phuul to phūloñ ko chāhiye ḳhushbū

har ek shai hai yahāñ dosto gadā kī tarah

'naqīb' ab koī pahchān hī nahīñ apnī

yahāñ to chhā ga.ī tahzīb-e-nau balā kī tarah

jafa wo karte rahe aise bewafa ki tarah

gila bhi kar na saka main kabhi gila ki tarah

wo sang-dil hai sitamgar hai be-murawwat hai

jo gham ka haal sune sirf waqia ki tarah

kisi ke bachne ka imkan nazar nahin aata

faza mein zahr hai phaila hua hawa ki tarah

main shayad ub chuka hun hayat se apni

mujhe hayat bhi lagti hai ab qaza ki tarah

kisi ko Das len to pani na pi sake yaro

hain aise log yahan nag dewta ki tarah

wo apna jurm chhupane ko shimr ban baiThe

hamara shahr bhi lagta hai karbala ki tarah

tumhaara husn-o-shabab in dinon maaz-allah

nazar jamaun to chhane lage nasha ki tarah

chaman ko phul to phulon ko chahiye KHushbu

har ek shai hai yahan dosto gada ki tarah

'naqib' ab koi pahchan hi nahin apni

yahan to chha gai tahzib-e-nau bala ki tarah