jafaen dekh liyan bewafaiyan dekhin

jafā.eñ dekh liyāñ bevafā.iyāñ dekhīñ

bhalā huā ki tirī sab burā.iyāñ dekhīñ

tirī galī se sadā ai kashanda-e-ālam

hazāroñ aatī huī chārpā.iyāñ dekhīñ

gayā nazar se jo vo garm tifl-e-ātish-bāz

ham apne chehre pe uḌtī havā.iyāñ dekhīñ

tire visāl ke ham shauq meñ hoñ āvāra

aziiz dost sabhoñ kī judā.iyāñ dekhīñ

hamesha mā.il-e-ā.īna hī tujhe paayā

jo dekhīñ ham ne yahī ḳhud-numā.īyāñ dekhīñ

shahāñ ki kohl-e-javāhar thī ḳhāk-e-pā jin kī

unhīñ kī āñkhoñ meñ phirte salā.iyāñ dekhīñ

banī na apnī to us jañg-jū se hargiz 'mīr'

laḌā.īñ jab se ham āñkheñ laḌā.iyāñ dekhīñ

jafaen dekh liyan bewafaiyan dekhin

bhala hua ki teri sab buraiyan dekhin

teri gali se sada ai kashanda-e-alam

hazaron aati hui chaarpaiyan dekhin

gaya nazar se jo wo garm tifl-e-atish-baz

hum apne chehre pe uDti hawaiyan dekhin

tere visal ke hum shauq mein hon aawara

aziz dost sabhon ki judaiyan dekhin

hamesha mail-e-aina hi tujhe paya

jo dekhin hum ne yahi KHud-numaiyan dekhin

shahan ki kohl-e-jawahar thi KHak-e-pa jin ki

unhin ki aankhon mein phirte salaiyan dekhin

bani na apni to us jang-ju se hargiz 'mir'

laDain jab se hum aankhen laDaiyan dekhin