jagah jagah se shikasta hain KHam hain diwaren

jagah jagah se shikasta haiñ ḳham haiñ dīvāreñ

na jaane kitne gharoñ kā bharam haiñ dīvāreñ

chhatoñ kā zikr hī kyā un ko le uḌī hai havā

ab hādsāt ke zer-e-qadam haiñ dīvāreñ

barastī bārishoñ meñ hoñgī mojib-e-ḳhatra

abhī to dhuup meñ abr-e-karam haiñ dīvāreñ

hamāre ḳheme tanāboñ ke bal pe qaa.em haiñ

chhateñ to ḳhuub mayassar haiñ kam haiñ dīvāreñ

qadīm shahroñ meñ har-sū qadam qadam bikhrī

purānī rāh-guzāroñ meñ zam haiñ dīvāreñ

kahīñ darīche haiñ shān-o-shikoh ke marsiyāñ-ḳhvāñ

kahīñ mazār-e-vaqār-o-hasham haiñ dīvāreñ

ye fart-e-girya-o-zārī kā hai asar 'manshā'

zamīñ makānoñ kī giilī hai nam haiñ dīvāreñ

jagah jagah se shikasta hain KHam hain diwaren

na jaane kitne gharon ka bharam hain diwaren

chhaton ka zikr hi kya un ko le uDi hai hawa

ab hadsat ke zer-e-qadam hain diwaren

barasti barishon mein hongi mojib-e-KHatra

abhi to dhup mein abr-e-karam hain diwaren

hamare KHeme tanabon ke bal pe qaem hain

chhaten to KHub mayassar hain kam hain diwaren

qadim shahron mein har-su qadam qadam bikhri

purani rah-guzaron mein zam hain diwaren

kahin dariche hain shan-o-shikoh ke marsiyan-KHwan

kahin mazar-e-waqar-o-hasham hain diwaren

ye fart-e-girya-o-zari ka hai asar 'mansha'

zamin makanon ki gili hai nam hain diwaren