jahaalaton ki ghulami se bach nikalne ka

jahālatoñ kī ġhulāmī se bach nikalne kā

sañbhal bhī jaao yahī vaqt hai sañbhalne kā

bulandiyāñ bhī kareñgī salām jhuk ke tumheñ

shu.ūr tum meñ agar hai zamīñ pe chalne kā

jo nā-umīdī ke bādal falak pe chhā.e hoñ

tum intizār karo barf ke pighalne kā

niDhāl ho ke lo sūraj bhī mahv-e-ḳhvāb huā

ai chāñd taaro yahī vaqt hai nikalne kā

maiñ vo charāġh huuñ jis meñ hai azm kā īñdhan

nahīñ hai ḳhauf mujhe āñdhiyoñ ke chalne kā

shafaq ke saa.e meñ din-rāt mil rahe haiñ gale

baḌā hasīn hai manzar ye shaam Dhalne kā

har ik savāl kā ma.aqūl do javāb ki 'shād'

nahīñ ye vaqt ḳhamoshī se haath malne kā

jahaalaton ki ghulami se bach nikalne ka

sanbhal bhi jao yahi waqt hai sanbhalne ka

bulandiyan bhi karengi salam jhuk ke tumhein

shuur tum mein agar hai zamin pe chalne ka

jo na-umidi ke baadal falak pe chhae hon

tum intizar karo barf ke pighalne ka

niDhaal ho ke lo suraj bhi mahw-e-KHwab hua

ai chand taro yahi waqt hai nikalne ka

main wo charagh hun jis mein hai azm ka indhan

nahin hai KHauf mujhe aandhiyon ke chalne ka

shafaq ke sae mein din-raat mil rahe hain gale

baDa hasin hai manzar ye sham Dhalne ka

har ek sawal ka maqul do jawab ki 'shad'

nahin ye waqt KHamoshi se hath malne ka