jahan-bhar se na yun mera tazkira kije

jahān-bhar se na yuuñ merā tazkira kiije

maiñ dil kā raaz huuñ dil se mirā gila kiije

ye kyā yaqīñ ki samajh legā har ishāra vo

laboñ kā farz nigāhoñ se kyuuñ adā kiije

nasīb meñ jo kabhī sub.h kā ujālā ho

to mil hī jā.egā har raat kyā duā kiije

ḳhulūs ko bhī yahāñ maslahat kaheñge log

bhalā yahī hai kisī se na jo bhalā kiije

dar-e-havas pe hai har-lahza ik na.ī dastak

jo ḳhud se chhupte na phirye to aur kyā kiije

ye jī meñ hai ki tirā but tarāsh kar barsoñ

tire huzūr khaḌe arz-e-mudda.ā kiije

tumhāre haal se ham be-ḳhabar nahīñ 'anjum'

par ab batāo ki kyā rañj ke sivā kiije

jahan-bhar se na yun mera tazkira kije

main dil ka raaz hun dil se mera gila kije

ye kya yaqin ki samajh lega har ishaara wo

labon ka farz nigahon se kyun ada kije

nasib mein jo kabhi subh ka ujala ho

to mil hi jaega har raat kya dua kije

KHulus ko bhi yahan maslahat kahenge log

bhala yahi hai kisi se na jo bhala kije

dar-e-hawas pe hai har-lahza ek nai dastak

jo KHud se chhupte na phirye to aur kya kije

ye ji mein hai ki tera but tarash kar barson

tere huzur khaDe arz-e-muddaa kije

tumhaare haal se hum be-KHabar nahin 'anjum'

par ab batao ki kya ranj ke siwa kije