jahan darkar thi kashti wahan maine bhanwar Dala

jahāñ darkār thī kashtī vahāñ maiñ ne bhañvar Daalā

mohabbat chāhiye thī us ko maiñ ne 'ishq kar Daalā

udhar āñkhoñ meñ us kī ranj-o-māyūsī ke aañsū the

maiñ ye samjhā kiyā iz.hār ne mere asar Daalā

khilā.e phuul nok-e-ḳhār ne terī hathelī par

ye kaisā haath shāḳh-e-gul pe tū ne be-ḳhabar Daalā

ḳhayāl aayā mujhe miTTī ko jab sonā banāne kā

to kar ke reza reza ḳhaak meñ sab apnā zar Daalā

rahīñ āñkheñ na dil ab aur na sannā’ī magar dekho

ki ḳhālī ho ke maiñ ne us ko kis ḳhūbī se bhar Daalā

lage duniyā meñ dil is ke liye vahshat zarūrī thī

banā kar aadmī thoḌā sā is meñ jānvar Daalā

hayā aa.ī dubāra us kī jānib dekhte 'āzam'

ki pahlī hī nazar ne us kā pairāhan katar Daalā

jahan darkar thi kashti wahan main ne bhanwar Dala

mohabbat chahiye thi us ko main ne 'ishq kar Dala

udhar aankhon mein us ki ranj-o-mayusi ke aansu the

main ye samjha kiya izhaar ne mere asar Dala

khilae phul nok-e-KHar ne teri hatheli par

ye kaisa hath shaKH-e-gul pe tu ne be-KHabar Dala

KHayal aaya mujhe miTTi ko jab sona banane ka

to kar ke reza reza KHak mein sab apna zar Dala

rahin aankhen na dil ab aur na sanna’i magar dekho

ki KHali ho ke main ne us ko kis KHubi se bhar Dala

lage duniya mein dil is ke liye wahshat zaruri thi

bana kar aadmi thoDa sa is mein jaanwar Dala

haya aai dubara us ki jaanib dekhte 'azam'

ki pahli hi nazar ne us ka pairahan katar Dala