jahan dekhun wahin wo apna chehra Dal deta hai

jahāñ dekhūñ vahīñ vo apnā chehra Daal detā hai

mirī āñkhoñ pe zālim aisā parda Daal detā hai

bahut jab minnateñ kartā hai būḌhā baap milne kī

to us ke khāte meñ kuchh paise beTā Daal detā hai

agar sar par udhārī hai to har dam yaad ye rakhnā

darāreñ aaj har rishte meñ paisa Daal detā hai

nazar aatā hai ḳhvāboñ tak meñ bas sayyād tab ham ko

hamāre zehn meñ jab koī piñjra Daal detā hai

usī chhat par utarte haiñ mohabbat ke parinde bhī

jahāñ par koī un ko āb-o-dāna Daal detā hai

mire ghar par jo aatā thā kabhī merā sagā ban kar

vahī ab bhaa.ī bhaa.ī meñ hī jhagḌā Daal detā hai

jahan dekhun wahin wo apna chehra Dal deta hai

meri aankhon pe zalim aisa parda Dal deta hai

bahut jab minnaten karta hai buDha bap milne ki

to us ke khate mein kuchh paise beTa Dal deta hai

agar sar par udhaari hai to har dam yaad ye rakhna

dararen aaj har rishte mein paisa Dal deta hai

nazar aata hai KHwabon tak mein bas sayyaad tab hum ko

hamare zehn mein jab koi pinjra Dal deta hai

usi chhat par utarte hain mohabbat ke parinde bhi

jahan par koi un ko aab-o-dana Dal deta hai

mere ghar par jo aata tha kabhi mera saga ban kar

wahi ab bhai bhai mein hi jhagDa Dal deta hai