jahan-e-am ko yaksar fareb deta hai

jahān-e-ām ko yaksar fareb detā hai

vo ġham-zada ho to hañs kar fareb detā hai

kuchh us kī tarz-e-adā bhī kamāl hai kuchh vo

nazar nazar se milā kar fareb detā hai

maiñ aise māhir-e-fan kā murīd huuñ jo mujhe

mire gumān se baḌh kar fareb detā hai

miTā ga.ī hai mujhe ik nigāh-e-nāz to kyā

baḌe-baḌoñ ko ye manzar fareb detā hai

ham ahl-e-dil bhī isī par yaqīn karte haiñ

hameñ ye dil jo ki aksar fareb detā hai

maiñ is liye bhī tirā ehtirām kartā huuñ

tū mujh ko mujh se bhī behtar fareb detā hai

'amar' ye us kā karam hai ki vo ik ahl-e-kamāl

agarche de bhī to kah kar fareb detā hai

jahan-e-am ko yaksar fareb deta hai

wo gham-zada ho to hans kar fareb deta hai

kuchh us ki tarz-e-ada bhi kamal hai kuchh wo

nazar nazar se mila kar fareb deta hai

main aise mahir-e-fan ka murid hun jo mujhe

mere guman se baDh kar fareb deta hai

miTa gai hai mujhe ek nigah-e-naz to kya

baDe-baDon ko ye manzar fareb deta hai

hum ahl-e-dil bhi isi par yaqin karte hain

hamein ye dil jo ki aksar fareb deta hai

main is liye bhi tera ehtiram karta hun

tu mujh ko mujh se bhi behtar fareb deta hai

'amar' ye us ka karam hai ki wo ek ahl-e-kamal

agarche de bhi to kah kar fareb deta hai