jahan-e-be-sabaati mein tamasha-e-jahan kab tak

jahān-e-be-sabātī meñ tamāshā-e-jahāñ kab tak

chamakte mehr-o-mah taare zamīn-o-āsmāñ kab tak

shab-e-ġham meñ tajallī par na itrā ai dil-e-muztar

sitāroñ kī ye chashmak aur raqs-e-kahkashāñ kab tak

samundar kī ḳhamoshī ek tūfāñ saath lā.egī

kisī nā-mehrbāñ kī ye nigāh-e-mehrbāñ kab tak

baḌhā.e jā qadam tū baḌh ke sargarm-e-amal ho jā

yūñhī taktā rahegā sū-e-gard-e-kārvāñ kab tak

lagā kar aag ḳhud hī kyoñ na bad-baḳhtī pe maiñ ro luuñ

jalā.eñ āshiyāñ ko mere āḳhir bijliyāñ kab tak

ye behtar hai falak honā hai jo kuchh ab vo ho jaa.e

rahūñ terī balā-e-nā-gahāñ ke darmiyāñ kab tak

kamāl-e-zabt par bhī ashk-e-ġham āñkhoñ se bah nikle

bhalā roke se ruk saktī thī ye sail-e-ravāñ kab tak

fazā-e-zīst par taarī hai 'aḳhtar' yaas kā aalam

na jaane matl.a-e-ummīd hogā zarfishāñ kab tak

jahan-e-be-sabaati mein tamasha-e-jahan kab tak

chamakte mehr-o-mah tare zamin-o-asman kab tak

shab-e-gham mein tajalli par na itra ai dil-e-muztar

sitaron ki ye chashmak aur raqs-e-kahkashan kab tak

samundar ki KHamoshi ek tufan sath laegi

kisi na-mehrban ki ye nigah-e-mehrban kab tak

baDhae ja qadam tu baDh ke sargarm-e-amal ho ja

yunhi takta rahega su-e-gard-e-karwan kab tak

laga kar aag KHud hi kyon na bad-baKHti pe main ro lun

jalaen aashiyan ko mere aaKHir bijliyan kab tak

ye behtar hai falak hona hai jo kuchh ab wo ho jae

rahun teri bala-e-na-gahan ke darmiyan kab tak

kamal-e-zabt par bhi ashk-e-gham aankhon se bah nikle

bhala roke se ruk sakti thi ye sail-e-rawan kab tak

faza-e-zist par tari hai 'aKHtar' yas ka aalam

na jaane matla-e-ummid hoga zarfishan kab tak