jahan-e-gul mein agar dasht-e-jaan nahin hota

jahān-e-gul meñ agar dasht-e-jāñ nahīñ hotā

kabhī ġhazāl-talab mehmāñ nahīñ hotā

khule haiñ bāra-darī ke tamām darvāze

magar vo chehra kahīñ se 'ayāñ nahīñ hotā

ye aur baat ki lutf-e-shanāvarī na mile

pa āñsuoñ kā samundar kahāñ nahīñ hotā

taḌap uThī thī jahāñ tishnagī kī āḳhirī lau

vahāñ se ab koī dariyā ravāñ nahīñ hotā

'atā na kartā agar vo mizāj-e-darveshī

to merī zaat se raushan jahāñ nahīñ hotā

machaltā rahtā hai kyoñ ab bhī titliyoñ ke liye

ye tifl-e-ishq mirā kyoñ javāñ nahīñ hotā

hai mere sāmne ḳhud apnā aa.ina bhī 'ziyā'

mirī nigāh se ojhal jahāñ nahīñ hotā

jahan-e-gul mein agar dasht-e-jaan nahin hota

kabhi ghazal-talab mehman nahin hota

khule hain bara-dari ke tamam darwaze

magar wo chehra kahin se 'ayan nahin hota

ye aur baat ki lutf-e-shanawari na mile

pa aansuon ka samundar kahan nahin hota

taDap uThi thi jahan tishnagi ki aaKHiri lau

wahan se ab koi dariya rawan nahin hota

'ata na karta agar wo mizaj-e-darweshi

to meri zat se raushan jahan nahin hota

machalta rahta hai kyon ab bhi titliyon ke liye

ye tifl-e-ishq mera kyon jawan nahin hota

hai mere samne KHud apna aaina bhi 'ziya'

meri nigah se ojhal jahan nahin hota