jahan-e-ishq ab suna paDa hai

jahān-e-ishq ab suunā paḌā hai

tumheñ pā kar ke bhī khonā paḌā hai

udāsī ho ga.ī mujh par musallat

tumheñ bhī rāt-din ronā paḌā hai

paḌā rahtā thā ik kone meñ har dam

magar ab mujh meñ hī konā paḌā hai

bhagāne ke liye ḳhvāboñ se tum ko

tasavvur meñ tumheñ chhūnā paḌā hai

yahī kyā kam qayāmat hai mirī jaañ

tumheñ chūme binā sonā paḌā hai

maiñ do se ek phir zero huā huuñ

magar ye ishq kyoñ duunā paḌā hai

tire dāman ke dāġhoñ ko mujhe jaañ

jigar ke ḳhuuñ se kyoñ dhonā paḌā hai

ġhamoñ kā bojh thā yaksāñ sabhī par

magar 'kāshif' ko hī Dhonā paḌā hai

jahan-e-ishq ab suna paDa hai

tumhein pa kar ke bhi khona paDa hai

udasi ho gai mujh par musallat

tumhein bhi raat-din rona paDa hai

paDa rahta tha ek kone mein har dam

magar ab mujh mein hi kona paDa hai

bhagane ke liye KHwabon se tum ko

tasawwur mein tumhein chhuna paDa hai

yahi kya kam qayamat hai meri jaan

tumhein chume bina sona paDa hai

main do se ek phir zero hua hun

magar ye ishq kyon duna paDa hai

tere daman ke daghon ko mujhe jaan

jigar ke KHun se kyon dhona paDa hai

ghamon ka bojh tha yaksan sabhi par

magar 'kashif' ko hi Dhona paDa hai