jahan mein mar mar ke ji raha hun KHushi KHushi gham uTha raha hun

jahāñ meñ mar mar ke jī rahā huuñ ḳhushī ḳhushī ġham uThā rahā huuñ

umiid himmat baḌhā rahī hai fareb-e-duniyā bhī khā rahā huuñ

mirī mohabbat ḳhafā ḳhafā hai mirī tamanna hai rūThī rūThī

ajiib aalam hai aaj merā ki sab ko begāna pā rahā huuñ

na pūchhiye kuchh jigar kī sozish nazar kī tābish nafas kī garmī

kisī ne baḳhshī hai ātish-e-ġham isī meñ ḳhud ko jalā rahā huuñ

sisaktī aaheñ machalte aañsū ye aaj hai har bashar kā aalam

chalegī āñdhī uTheñge tūfāñ kuchh aise āsār pā rahā huuñ

dil-o-nazar kā muāmla hai ki imtihāñ husn-o-ishq kā hai

koī mujhe aazmā rahā hai kisī ko maiñ aazmā rahā huuñ

laraztī palkoñ pe chand aañsū jo aaj rah rah ke aa rahe haiñ

diye haiñ nākām hasratoñ ke jalā rahā huuñ bujhā rahā huuñ

mirī vafā rāhbar hai merī mirī tamanna hai saath mere

zarūr manzil milegī ik din nishān manzil ke pā rahā huuñ

nazākat-e-dil nigāh-e-ulfat jamāl-e-hastī bahār-e-duniyā

ye sab ke sab haiñ hasīn dhoke magar maiñ dānista khā rahā huuñ

jahan mein mar mar ke ji raha hun KHushi KHushi gham uTha raha hun

umid himmat baDha rahi hai fareb-e-duniya bhi kha raha hun

meri mohabbat KHafa KHafa hai meri tamanna hai ruThi ruThi

ajib aalam hai aaj mera ki sab ko begana pa raha hun

na puchhiye kuchh jigar ki sozish nazar ki tabish nafas ki garmi

kisi ne baKHshi hai aatish-e-gham isi mein KHud ko jala raha hun

sisakti aahen machalte aansu ye aaj hai har bashar ka aalam

chalegi aandhi uThenge tufan kuchh aise aasar pa raha hun

dil-o-nazar ka muamla hai ki imtihan husn-o-ishq ka hai

koi mujhe aazma raha hai kisi ko main aazma raha hun

larazti palkon pe chand aansu jo aaj rah rah ke aa rahe hain

diye hain nakaam hasraton ke jala raha hun bujha raha hun

meri wafa rahbar hai meri meri tamanna hai sath mere

zarur manzil milegi ek din nishan manzil ke pa raha hun

nazakat-e-dil nigah-e-ulfat jamal-e-hasti bahaar-e-duniya

ye sab ke sab hain hasin dhoke magar main danista kha raha hun