jahan mein mast-e-alast intiKHab kya karte

jahāñ meñ mast-e-alast intiḳhāb kyā karte

subū-o-shīsha-o-jām-e-sharāb kyā karte

har ek zarra hai ā.īna-dār-e-husn-e-sanam

nigāh-e-ġhaur se ham intiḳhāb kyā karte

hai inqalāb kī tafsīr daftar-e-hastī

ham is sahīfe se phir iktisāb kyā karte

faroġh-e-husn se ḳhīra nigāh-e-ishq huī

tajalliyoñ ko vo zer-e-naqāb kyā karte

ye hai vo ne.amat-e-nāyāb jo hai jān-e-hayāt

luTā chuke jo matā-e-shabāb kyā karte

kahāñ vo himmateñ baaqī kahāñ vo dil vo dimāġh

salaf kā haal meñ paidā javāb kyā karte

rahīn-e-jumbish-e-mauj-e-fanā hai kashtī-e-umr

uThā ke sar yahāñ misl-e-habāb kyā karte

azal se rū-ba-taġhayyur nizām-e-ālam hai

bapā ham is meñ koī inqilāb kyā karte

hai kār-zār-e-amal garm chār-sū 'tālib'

matā-e-vaqt kī miTTī ḳharāb kyā karte

jahan mein mast-e-alast intiKHab kya karte

subu-o-shisha-o-jam-e-sharab kya karte

har ek zarra hai aaina-dar-e-husn-e-sanam

nigah-e-ghaur se hum intiKHab kya karte

hai inqalab ki tafsir daftar-e-hasti

hum is sahife se phir iktisab kya karte

farogh-e-husn se KHira nigah-e-ishq hui

tajalliyon ko wo zer-e-naqab kya karte

ye hai wo neamat-e-nayab jo hai jaan-e-hayat

luTa chuke jo mata-e-shabab kya karte

kahan wo himmaten baqi kahan wo dil wo dimagh

salaf ka haal mein paida jawab kya karte

rahin-e-jumbish-e-mauj-e-fana hai kashti-e-umr

uTha ke sar yahan misl-e-habab kya karte

azal se ru-ba-taghayyur nizam-e-alam hai

bapa hum is mein koi inqilab kya karte

hai kar-zar-e-amal garm chaar-su 'talib'

mata-e-waqt ki miTTi KHarab kya karte