jahan pe Dub gaya tha kabhi sitara mera

jahāñ pe Duub gayā thā kabhī sitāra mirā

usī ufuq pe jahāñ-tāb hai nazāra mirā

yahī huā ki parinde fazā meñ tair ga.e

na kaam aa.iiñ mirī bandisheñ na chāra mirā

havā-e-dasht bhī majnūñ-sifat nahīñ hai agar

to is maqām pe shāyad na ho guzāra mirā

abhī to harf-e-tamannā likhā nahīñ maiñ ne

abhī se kyuuñ varaq-jāñ hai paara paara mirā

na aag lagtī na taqsīm-e-jism-o-jāñ hotī

fuġhāñ ki shahr-e-sitam par nahīñ ijāra mirā

vo tīrgī hai ki rāh-e-ḳhayāl bhī gum hai

na āsmān hai raushan na isti.āra mirā

na koī dasht munavvar huā na dar 'nāmī'

navāh-e-ġhair meñ jal bujh gayā sharāra mirā

jahan pe Dub gaya tha kabhi sitara mera

usi ufuq pe jahan-tab hai nazara mera

yahi hua ki parinde faza mein tair gae

na kaam aain meri bandishen na chaara mera

hawa-e-dasht bhi majnun-sifat nahin hai agar

to is maqam pe shayad na ho guzara mera

abhi to harf-e-tamanna likha nahin main ne

abhi se kyun waraq-jaan hai para para mera

na aag lagti na taqsim-e-jism-o-jaan hoti

fughan ki shahr-e-sitam par nahin ijara mera

wo tirgi hai ki rah-e-KHayal bhi gum hai

na aasman hai raushan na istiara mera

na koi dasht munawwar hua na dar 'nami'

nawah-e-ghair mein jal bujh gaya sharara mera