jaise jaise dard ka pindar baDhta jae hai

jaise jaise dard kā pindār baḌhtā jaa.e hai

e'timād-e-lazzat-e-āzār baḌhtā jaa.e hai

dil umaDtā aa.e hai miTTī huī jaatī hai nam

zindagī par zindagī kā baar baḌhtā jaa.e hai

ye na pūchho dekhtā jaatā hai muḌ muḌ kar kise

ek dīvāna ki sū-e-dār baḌhtā jaa.e hai

kuchh na kuchh honā hai āḳhir tap ke kundan jal ke raakh

dil kī jānib sho.ala-e-afkār baḌhtā jaa.e hai

āgahī kā sadqa vājib hai uThāo jām-e-zahr

lamha lamha vaqt kā isrār baḌhtā jaa.e hai

saḳhtī-e-rāh-e-talab se dil laraztā hai magar

mujh se aage jazba-e-bedār baḌhtā jaa.e hai

rafta rafta soz-e-hirmāñ hotā jaatā hai fuzūñ

rafta rafta zindagī se pyaar baḌhtā jaa.e hai

ye jahān-e-āb-o-gil hai imtihāñ-gāh-e-shu.ūr

ġham ba-qadr-e-azmat-e-kirdār baḌhtā jaa.e hai

kyā ḳhabar 'hurmat' ki takmīl-e-safar ho kis tarah

iltifāt-e-vādī-e-pur-ḳhār baḌhtā jaa.e hai

jaise jaise dard ka pindar baDhta jae hai

e'timad-e-lazzat-e-azar baDhta jae hai

dil umaDta aae hai miTTi hui jati hai nam

zindagi par zindagi ka bar baDhta jae hai

ye na puchho dekhta jata hai muD muD kar kise

ek diwana ki su-e-dar baDhta jae hai

kuchh na kuchh hona hai aaKHir tap ke kundan jal ke rakh

dil ki jaanib shoala-e-afkar baDhta jae hai

aagahi ka sadqa wajib hai uThao jam-e-zahr

lamha lamha waqt ka israr baDhta jae hai

saKHti-e-rah-e-talab se dil larazta hai magar

mujh se aage jazba-e-bedar baDhta jae hai

rafta rafta soz-e-hirman hota jata hai fuzun

rafta rafta zindagi se pyar baDhta jae hai

ye jahan-e-ab-o-gil hai imtihan-gah-e-shuur

gham ba-qadr-e-azmat-e-kirdar baDhta jae hai

kya KHabar 'hurmat' ki takmil-e-safar ho kis tarah

iltifat-e-wadi-e-pur-KHar baDhta jae hai