jaise KHushbu ko saliqe se saba le jae

jaise ḳhushbū ko salīqe se sabā le jaa.e

koī aise hī mujhe mujh se chhuḌā le jaa.e

marhala-vār bikhartī hī ga.ī huuñ ḳhud meñ

ab jidhar chāhe havā mujh ko uḌā le jaa.e

jāzbiyyat hai baḌī raunaq-e-duniyā tujh meñ

ik ġhazāl aa.e mujhe sab se bachā le jaa.e

haa.e vo garmī-e-bāzār-e-tamanna ki mujhe

har talab ḳhvāb ke naake pe biThā le jaa.e

ab vo chehra na ḳhadd-o-ḳhāl haiñ baaqī mere

koī tasvīr se sab rañg churā le jaa.e

roz aatā hai mirī ḳhalvat jaañ meñ koī

yaad kī bhiiḌ meñ chupke se uThā le jaa.e

husn marhūn-e-tamāshā-e-tamanna us kā

jo ki hāthoñ se mire rañg-e-hinā le jaa.e

jaise KHushbu ko saliqe se saba le jae

koi aise hi mujhe mujh se chhuDa le jae

marhala-war bikharti hi gai hun KHud mein

ab jidhar chahe hawa mujh ko uDa le jae

jazbiyyat hai baDi raunaq-e-duniya tujh mein

ek ghazal aae mujhe sab se bacha le jae

hae wo garmi-e-bazar-e-tamanna ki mujhe

har talab KHwab ke nake pe biTha le jae

ab wo chehra na KHadd-o-KHal hain baqi mere

koi taswir se sab rang chura le jae

roz aata hai meri KHalwat jaan mein koi

yaad ki bhiD mein chupke se uTha le jae

husn marhun-e-tamasha-e-tamanna us ka

jo ki hathon se mere rang-e-hina le jae