jal gain aankhen sabhi KHush-rang chehre uD gae

jal ga.iiñ āñkheñ sabhī ḳhush-rañg chehre uḌ ga.e

aisī garmī thī ki ā.īnoñ ke paare uḌ ga.e

shaam tak bhī jab koī niklā na daana Dālne

aañkh bhar bhar kar muñDeroñ se parinde uḌ ga.e

ḳhushbuoñ ke rath se utre baal pochhā aur phir

titliyoñ ke dosh par kāfūrī lamhe uḌ ga.e

be-ḳhayālī mujh ko merī soch tak le aa.ī aur

chauñkte hī mere kāñdhe se farishte uḌ ga.e

sab ke sab kal harf harf almāriyoñ meñ band the

kis tarah āḳhir kitāboñ se navishte uḌ ga.e

aa gayā ḳhadshāt kī bāhoñ meñ yādoñ kā badan

ik dhamāka aur ḳhvāboñ ke parḳhache uḌ ga.e

thī baḌī saffāk mere ahd kī gūñgī havā

bas yahī ki gardanoñ se saare rishte uḌ ga.e

jal gain aankhen sabhi KHush-rang chehre uD gae

aisi garmi thi ki aainon ke pare uD gae

sham tak bhi jab koi nikla na dana Dalne

aankh bhar bhar kar munDeron se parinde uD gae

KHushbuon ke rath se utre baal pochha aur phir

titliyon ke dosh par kafuri lamhe uD gae

be-KHayali mujh ko meri soch tak le aai aur

chaunkte hi mere kandhe se farishte uD gae

sab ke sab kal harf harf almariyon mein band the

kis tarah aaKHir kitabon se nawishte uD gae

aa gaya KHadshat ki bahon mein yaadon ka badan

ek dhamaka aur KHwabon ke parKHache uD gae

thi baDi saffak mere ahd ki gungi hawa

bas yahi ki gardanon se sare rishte uD gae