jal raha hai ek diya aankhon mein aadhi raat ka

jal rahā hai ik diyā āñkhoñ meñ aadhī raat kā

maiñ amānat-dār huuñ ab tak tirī sauġhāt kā

umr guzrī mausam-e-girya nahīñ Thahrā kahīñ

qarz ik baaqī rahā mujh pe kisī barsāt kā

duur hote jā rahe the sāhiloñ par do charāġh

bādbāñ ne rakh liyā thā aks bhī ik baat kā

dil meñ aur āñkhoñ meñ tujh se chhūT jaane kā malāl

tazkira hoñToñ pe lekin dūsre hālāt kā

jāgte sote meñ terī yaad ke pahlū bahut

aur har pahlū hai raushan aise imkānāt kā

ham bhī kuchh majbūriyoñ kī aaḌ meñ milte rahe

paas kuchh us ne bhī rakkhā mere ehsāsāt kā

jal raha hai ek diya aankhon mein aadhi raat ka

main amanat-dar hun ab tak teri saughat ka

umr guzri mausam-e-girya nahin Thahra kahin

qarz ek baqi raha mujh pe kisi barsat ka

dur hote ja rahe the sahilon par do charagh

baadban ne rakh liya tha aks bhi ek baat ka

dil mein aur aankhon mein tujh se chhuT jaane ka malal

tazkira honTon pe lekin dusre haalat ka

jagte sote mein teri yaad ke pahlu bahut

aur har pahlu hai raushan aise imkanat ka

hum bhi kuchh majburiyon ki aaD mein milte rahe

pas kuchh us ne bhi rakkha mere ehsasat ka