jal raha hun to ajab rang o saman hai mera

jal rahā huuñ to ajab rañg o samāñ hai merā

āsmāñ jis ko samajhte ho dhuāñ hai merā

le ga.ī bāñdh ke vahshat use sahrā kī taraf

ek dil hī to thā ab vo bhī kahāñ hai merā

dekh le tū bhī ki ye āḳhirī manzar hai mirā

jis ko kahte haiñ shafaq rañg-e-ziyāñ hai merā

apnā hī zor-e-tanaffus na miTā de mujh ko

in dinoñ zad pe mirī ḳhema-e-jāñ hai merā

zarra-e-ḳhāk bhī hotā hai kabhī bār-e-girāñ

kabhī lagtā hai ki ye saarā jahāñ hai merā

ab ufuq-tā-ba-ufuq meñ huuñ har ā.īne meñ

jaise har samt o jihat aks-e-ravāñ hai merā

ruk gayā aa ke jahāñ qāfila-e-rañg-o-nashāt

kuchh qadam aage zarā baḌh ke makāñ hai merā

jal raha hun to ajab rang o saman hai mera

aasman jis ko samajhte ho dhuan hai mera

le gai bandh ke wahshat use sahra ki taraf

ek dil hi to tha ab wo bhi kahan hai mera

dekh le tu bhi ki ye aaKHiri manzar hai mera

jis ko kahte hain shafaq rang-e-ziyan hai mera

apna hi zor-e-tanaffus na miTa de mujh ko

in dinon zad pe meri KHema-e-jaan hai mera

zarra-e-KHak bhi hota hai kabhi bar-e-giran

kabhi lagta hai ki ye sara jahan hai mera

ab ufuq-ta-ba-ufuq mein hun har aaine mein

jaise har samt o jihat aks-e-rawan hai mera

ruk gaya aa ke jahan qafila-e-rang-o-nashat

kuchh qadam aage zara baDh ke makan hai mera