jala hai hae kis jaan-e-chaman ki sham-e-mahfil se

jalā hai haa.e kis jān-e-chaman kī sham-e-mahfil se

mahak phūloñ kī aatī hai sharār-e-ātish-e-dil se

ye dāmān-e-havādis se qayāmat tak na gul hogā

charāġh-e-dil mirā raushan hai un kī sham-e-mahfil se

janāb-e-ḳhizr ham ko ḳhaak raste par lagā.eñge

ki manzil be-ḳhudoñ kī hai muarra qaid-e-manzil se

Thahar bhī ai ḳhayāl-e-hashr aur ik jaam piine de

saraktā hai abhī zulmat kā parda ḳhāna-e-dil se

sahar ne le ke añgḌā.ī tilism-e-nāz-shab toḌā

falak par husn kī sham.eñ uThīñ tāroñ kī mahfil se

baḌhā hai kaun ye girdāb kī ḳhūrāk hone ko

ki uTThā shor-e-mātam yak-ba-yak amboh-e-sāhil se

mirī bālīñ se uTh kar rone vaalo ye bhī sochā hai

chalā huuñ kis kī mahfil meñ uThā huuñ kis kī mahfil se

hai us kambaḳht ko zid soz-e-bātin se pighal jā.ūñ

nigāhoñ ne tumhārī kah diyā hai kyā mire dil se

na dāman-gīr-e-dil ho nā-ḳhudā phir koī nazzāra

ḳhudā ke vāste kashtī baḌhā āġhosh-e-sāhil se

sipurd-e-be-ḳhudī kar de farā.ez aql-e-ḳhud-bīñ ke

haTā de is siyah-bātin kā pahrā ḳhāna-e-dil se

har ik zarra hai dil ai jaane vaale dekh kar chalnā

hazāroñ hastiyāñ lipTī paḌī haiñ ḳhāk-e-manzil se

mirī bebāk nazreñ un kī jānib uTh hī jaatī haiñ

abhī 'ehsān' maiñ vāqif nahīñ ādāb-e-mahfil se

jala hai hae kis jaan-e-chaman ki sham-e-mahfil se

mahak phulon ki aati hai sharar-e-atish-e-dil se

ye daman-e-hawadis se qayamat tak na gul hoga

charagh-e-dil mera raushan hai un ki sham-e-mahfil se

janab-e-KHizr hum ko KHak raste par lagaenge

ki manzil be-KHudon ki hai muarra qaid-e-manzil se

Thahar bhi ai KHayal-e-hashr aur ek jam pine de

sarakta hai abhi zulmat ka parda KHana-e-dil se

sahar ne le ke angDai tilism-e-naz-shab toDa

falak par husn ki shamen uThin taron ki mahfil se

baDha hai kaun ye girdab ki KHurak hone ko

ki uTTha shor-e-matam yak-ba-yak amboh-e-sahil se

meri baalin se uTh kar rone walo ye bhi socha hai

chala hun kis ki mahfil mein uTha hun kis ki mahfil se

hai us kambaKHt ko zid soz-e-baatin se pighal jaun

nigahon ne tumhaari kah diya hai kya mere dil se

na daman-gir-e-dil ho na-KHuda phir koi nazzara

KHuda ke waste kashti baDha aaghosh-e-sahil se

sipurd-e-be-KHudi kar de faraez aql-e-KHud-bin ke

haTa de is siyah-baatin ka pahra KHana-e-dil se

har ek zarra hai dil ai jaane wale dekh kar chalna

hazaron hastiyan lipTi paDi hain KHak-e-manzil se

meri bebak nazren un ki jaanib uTh hi jati hain

abhi 'ehsan' main waqif nahin aadab-e-mahfil se