jalai gai hawa magar uTha kahin dhuan nahin

jalā.ī ga.ī havā magar uThā kahīñ dhuāñ nahīñ

jo bach ga.e dayār meñ vo apne āshiyāñ nahīñ

lahū-lahū zamīn hai lahū-lahū hai āsmāñ

ye naqsh-e-pā-e-dil safar ke āḳhirī nishāñ nahīñ

kahāñ ga.e haiñ log sab qarār-o-qaul bhuul kar

talāsh meñ bhaTak rahe haiñ ham kahāñ kahāñ nahīñ

ḳhudā ḳhudā kā shor kyoñ uThā mire vajūd par

maiñ bhiiḌ meñ to huuñ magar kisī ke darmiyāñ nahīñ

har ek lahr ḳhāmushī se phir kināra kar ga.ī

vo mausamī nadī thī zindagī kā kārvāñ nahīñ

‘anāsir-e-davāñ pe hai ye kis nigāh kā fusūñ

maiñ qaid huuñ to huuñ magar qafas meñ tīliyāñ nahīñ

jalai gai hawa magar uTha kahin dhuan nahin

jo bach gae dayar mein wo apne aashiyan nahin

lahu-lahu zamin hai lahu-lahu hai aasman

ye naqsh-e-pa-e-dil safar ke aaKHiri nishan nahin

kahan gae hain log sab qarar-o-qaul bhul kar

talash mein bhaTak rahe hain hum kahan kahan nahin

KHuda KHuda ka shor kyon uTha mere wajud par

main bhiD mein to hun magar kisi ke darmiyan nahin

har ek lahr KHamushi se phir kinara kar gai

wo mausami nadi thi zindagi ka karwan nahin

‘anasir-e-dawan pe hai ye kis nigah ka fusun

main qaid hun to hun magar qafas mein tiliyan nahin