jalta charagh raat ki chaukhaT pe chhoD kar

jaltā charāġh raat kī chaukhaT pe chhoḌ kar

ham āsmān se laa.e haiñ ik sub.h toḌ kar

jaane mirī kitāb se kaise nikal ga.e

rakkhe the us kī yaad ke safhāt moḌ kar

shāyad hamāre vasl kī sūrat nikal paḌe

dekheñge aaj haath kī satroñ ko joḌ kar

gum ho ga.e haiñ surmagīñ almāriyoñ ke ḳhvāb

aayā thā koī raat ke tāloñ ko toḌ kar

ik umr ham ne vaar dī ġham kī sabīl par

ik būñd-e-ishq pā liyā duniyā nichoḌ kar

rahte haiñ ham to aaj bhī vahshat ke ās-pās

haañ haañ vahī makān hai do galiyāñ chhoḌ kar

jalta charagh raat ki chaukhaT pe chhoD kar

hum aasman se lae hain ek subh toD kar

jaane meri kitab se kaise nikal gae

rakkhe the us ki yaad ke safhat moD kar

shayad hamare wasl ki surat nikal paDe

dekhenge aaj hath ki satron ko joD kar

gum ho gae hain surmagin almariyon ke KHwab

aaya tha koi raat ke talon ko toD kar

ek umr hum ne war di gham ki sabil par

ek bund-e-ishq pa liya duniya nichoD kar

rahte hain hum to aaj bhi wahshat ke aas-pas

han han wahi makan hai do galiyan chhoD kar