jalta tha raat hi se dil-e-yasman tamam

jaltā thā raat hī se dil-e-yāsman tamām

ruḳhsat thī sub.h tak ye bahār-e-chaman tamām

jazba ye rashk ka hai ai ushshāq kush mujhe

bāzār se ḳharīd liye haiñ kafan tamām

dil jal rahā hai vahshat-e-yād-e-ġhazāl se

raushan haiñ is charāġh se dasht-o-daman tamām

muddat se haiñ paḌe hue chaukhaT pe yaar kī

pāmāl ho chuke haiñ mire rūh-o-tan tamām

kamzor hai bahut dil-e-be-sāḳhta mirā

aur shahar meñ hukūmat-e-yak-but-shikan tamām

qatl-e-bahār ho gayā phūloñ ke des meñ

ġhunchoñ ne chāk-chāk kiye pairahan tamām

kis kī shab-e-siyāh bujhī koh-e-tūr par

kis āftāb-e-hashr pe aayā gahan tamām

jalta tha raat hi se dil-e-yasman tamam

ruKHsat thi subh tak ye bahaar-e-chaman tamam

jazba ye rashk ka hai ai ushshaq kush mujhe

bazar se KHarid liye hain kafan tamam

dil jal raha hai wahshat-e-yaad-e-ghazal se

raushan hain is charagh se dasht-o-daman tamam

muddat se hain paDe hue chaukhaT pe yar ki

pamal ho chuke hain mere ruh-o-tan tamam

kamzor hai bahut dil-e-be-saKHta mera

aur shahar mein hukumat-e-yak-but-shikan tamam

qatl-e-bahaar ho gaya phulon ke des mein

ghunchon ne chaak-chaak kiye pairahan tamam

kis ki shab-e-siyah bujhi koh-e-tur par

kis aaftab-e-hashr pe aaya gahan tamam