jalti hui zamin ki nigahen taras gain

jaltī huī zamīñ kī nigāheñ taras ga.iiñ

jā kar samundaroñ pe ghaTā.eñ baras ga.iiñ

Thahre na pag havāoñ ke taptī zamīn par

shabnam-sifat jo aa.iiñ to sho.ala-nafas ga.iiñ

shādāb vādiyāñ thiiñ jahāñ ab vahāñ haiñ dasht

sarsar kī nāgineñ ghane peḌoñ ko Das ga.iiñ

phailā huā hai pyaas kā sahrā nigāh meñ

amrit bharī ghaTāoñ ko āñkheñ taras ga.iiñ

ḳhālī hai ab makān ki ḳhvāhish kī sūrateñ

aglī mohabbatoñ ke mazāroñ meñ bas ga.iiñ

dilkash bahut thī aag thī jab tak paḌos meñ

phailī jo apne ghar meñ umīdeñ jhulas ga.iiñ

'shāhid' unhī meñ thī vo jise chāhtā huuñ maiñ

mujh par jo laḌkiyāñ sar-e-bāzār hans ga.iiñ

jalti hui zamin ki nigahen taras gain

ja kar samundaron pe ghaTaen baras gain

Thahre na pag hawaon ke tapti zamin par

shabnam-sifat jo aain to shoala-nafas gain

shadab wadiyan thin jahan ab wahan hain dasht

sarsar ki naginen ghane peDon ko Das gain

phaila hua hai pyas ka sahra nigah mein

amrit bhari ghaTaon ko aankhen taras gain

KHali hai ab makan ki KHwahish ki suraten

agli mohabbaton ke mazaron mein bas gain

dilkash bahut thi aag thi jab tak paDos mein

phaili jo apne ghar mein umiden jhulas gain

'shahid' unhi mein thi wo jise chahta hun main

mujh par jo laDkiyan sar-e-bazar hans gain