jalwa afroz hai kabe ke ujalon ki tarah

jalva afroz hai ka.abe ke ujāloñ kī tarah

dil kī ta.amīr ki kal tak thī shivāloñ kī tarah

aql-e-vārafta ke be-nūr bayābānoñ meñ

ham bhaTakte rahe āvāra ḳhayāloñ kī tarah

ham ki is bazm meñ haiñ sāya-e-ġham kī sūrat

kaun dekhegā hameñ zohra-jamāloñ kī tarah

haath baḌhtā nahīñ rindoñ kā hamārī jānib

ham ḳharābāt meñ haiñ ḳhālī pyāloñ kī tarah

jab koī ḳhār-e-sitam dil meñ utar aatā hai

phuuT kar rotā hai dil paañv ke chhāloñ kī tarah

jab bhī paḌhtā huuñ kitāb-e-ġham-e-hastī ai dil

tazkira un kā bhī miltā hai havāloñ kī tarah

soz-o-ehsās kī tasvīr hai qalb-e-shā.er

naġhme taḳhlīq huā karte haiñ nāloñ kī tarah

arsa-e-dahr meñ kī ham ne basar 'yazdānī'

zulmat-e-shab kī tarah din ke ujāloñ kī tarah

jalwa afroz hai kabe ke ujalon ki tarah

dil ki tamir ki kal tak thi shiwalon ki tarah

aql-e-warafta ke be-nur bayabanon mein

hum bhaTakte rahe aawara KHayalon ki tarah

hum ki is bazm mein hain saya-e-gham ki surat

kaun dekhega hamein zohra-jamalon ki tarah

hath baDhta nahin rindon ka hamari jaanib

hum KHarabaat mein hain KHali pyalon ki tarah

jab koi KHar-e-sitam dil mein utar aata hai

phuT kar rota hai dil panw ke chhaalon ki tarah

jab bhi paDhta hun kitab-e-gham-e-hasti ai dil

tazkira un ka bhi milta hai hawalon ki tarah

soz-o-ehsas ki taswir hai qalb-e-shaer

naghme taKHliq hua karte hain nalon ki tarah

arsa-e-dahr mein ki hum ne basar 'yazdani'

zulmat-e-shab ki tarah din ke ujalon ki tarah