jalwa ayan hai qudrat-e-parwardigar ka

jalva ayaañ hai qudrat-e-parvardigār kā

kyā dil-kushā ye scene hai fasl-e-bahār kā

nāzāñ haiñ josh-e-husn pe gul-hā-e-dil-fareb

joban dikhā rahā hai ye aalam ubhār kā

haiñ dīdanī banafsha o sumbul ke pech o taab

naqsha khīñchā huā hai ḳhat-o-zulf-e-yār kā

sabza hai yā ye āb-e-zamurrad kī mauj hai

shabnam hai bahr yā guhar-e-ābdār kā

murġhān-e-bāġh zamzama-sanjī meñ mahv haiñ

aur naach ho rahā hai nasīm-e-bahār kā

parvāz meñ haiñ tītaryāñ shaad o chust o mast

zeb-e-badan kiye hue ḳhil.at bahār kā

mauj-e-havā o zamzama-e-andalīb-e-mast

ik sāz-e-dil-navāz hai mizrāb-o-tār kā

abr-e-tunak ne raunaq-e-mausam baḌhā.ī hai

ġhāza banā hai rū-e-urūs-e-bahār kā

afsos is samāñ meñ bhī 'akbar' udaas hai

sūhān-e-rūh hijr hai ik gul-e-ezār kā

jalwa ayan hai qudrat-e-parwardigar ka

kya dil-kusha ye scene hai fasl-e-bahaar ka

nazan hain josh-e-husn pe gul-ha-e-dil-fareb

joban dikha raha hai ye aalam ubhaar ka

hain didani banafsha o sumbul ke pech o tab

naqsha khincha hua hai KHat-o-zulf-e-yar ka

sabza hai ya ye aab-e-zamurrad ki mauj hai

shabnam hai bahr ya guhar-e-abdar ka

murghan-e-bagh zamzama-sanji mein mahw hain

aur nach ho raha hai nasim-e-bahaar ka

parwaz mein hain titaryan shad o chust o mast

zeb-e-badan kiye hue KHilat bahaar ka

mauj-e-hawa o zamzama-e-andalib-e-mast

ek saz-e-dil-nawaz hai mizrab-o-tar ka

abr-e-tunak ne raunaq-e-mausam baDhai hai

ghaza bana hai ru-e-urus-e-bahaar ka

afsos is saman mein bhi 'akbar' udas hai

suhan-e-ruh hijr hai ek gul-e-ezar ka