jalwa-e-didar to ek baat hai

jalva-e-dīdār to ik baat hai

lan-tarānī āshiqoñ kī ghaat hai

āshnā jis kā hai tū ārām-e-jāñ

vo jahāñ meñ morid-e-āfāt hai

bosa-e-ruḳh de zakāt-e-husn hai

ai hasīñ ye dāḳhil-e-hasnāt hai

ā.ina-ḳhāna banā hai merā dil

dekh le kyā ḳhushnumā mir.āt hai

jān-o-dil thā nazr terī kar chukā

tere āshiq kī yahī auqāt hai

girya-e-ushshāq par haiñ ḳhanda-zan

kahte haiñ kyā ḳhushnumā barsāt hai

hijr kī shab hai hujūm-e-sad-balā

maiñ huuñ tanhā aur ḳhudā kī zaat hai

ḳhātma-bil-ḳhair ho jaa.e kahīñ

sharm apnī ab ḳhudā ke haath hai

zindagī hai chaar din kī chāñdnī

phir vahī 'sāqī' añdherī raat hai

jalwa-e-didar to ek baat hai

lan-tarani aashiqon ki ghat hai

aashna jis ka hai tu aaram-e-jaan

wo jahan mein morid-e-afat hai

bosa-e-ruKH de zakat-e-husn hai

ai hasin ye daKHil-e-hasnat hai

aaina-KHana bana hai mera dil

dekh le kya KHushnuma miraat hai

jaan-o-dil tha nazr teri kar chuka

tere aashiq ki yahi auqat hai

girya-e-ushshaq par hain KHanda-zan

kahte hain kya KHushnuma barsat hai

hijr ki shab hai hujum-e-sad-bala

main hun tanha aur KHuda ki zat hai

KHatma-bil-KHair ho jae kahin

sharm apni ab KHuda ke hath hai

zindagi hai chaar din ki chandni

phir wahi 'saqi' andheri raat hai