jalwa-e-sham hai ye subh ka manzar to nahin

jalva-e-shām hai ye sub.h kā manzar to nahīñ

chāñd kaisā bhī ho sūraj ke barābar to nahīñ

qaht-e-shamshād-e-qadāñ vaj.h-e-sar-afrāzī hai

varna sarkār kuchh aise bhī qad-āvar to nahīñ

ism-e-āzam koī phūñke to ye jaadū TuuTe

but bane sehr se ham-sañg ke paikar to nahīñ

kaam aa.egī sarv-o-sañg kī nisbat varna

dar-numā naqsh haiñ dīvār pe ye dar to nahīñ

jazba-e-shauqat-e-ta.amīr banā marqad-e-shauq

is na.e shahr ke ye tāj-mahal ghar to nahīñ

jalwa-e-sham hai ye subh ka manzar to nahin

chand kaisa bhi ho suraj ke barabar to nahin

qaht-e-shamshad-e-qadan wajh-e-sar-afraazi hai

warna sarkar kuchh aise bhi qad-awar to nahin

ism-e-azam koi phunke to ye jadu TuTe

but bane sehr se ham-sang ke paikar to nahin

kaam aaegi sarw-o-sang ki nisbat warna

dar-numa naqsh hain diwar pe ye dar to nahin

jazba-e-shauqat-e-tamir bana marqad-e-shauq

is nae shahr ke ye taj-mahal ghar to nahin