jalwa-gar fanus-e-tan mein hai hamara man charagh

jalva-gar fānūs-e-tan meñ hai hamārā man charāġh

be-batī aur tel ye hai roz o shab raushan charāġh

tā-abad is ko nahīñ bād-e-muḳhālif se ḳhatar

hai hamāre haath par be-parda-e-dāman charāġh

aaj kī shab lutf hai sair-e-chaman ai 'andalīb

roġhan-e-gul se huā hai har gul-e-gulshan charāġh

Dar nahīñ majnūñ ko phirne kā shab-e-hijrāñ ke biich

haq meñ us ke dīda-e-āhū hue ban ban charāġh

yak nazar us kī dil-e-mushtāq hai jin ne ki aaj

ek jalve meñ kiyā hai ḳhāna-e-darpan charāġh

jab se hai raushan diloñ ke dil pe 'hātim' kī nigāh

tab se raushan hai gā us ke dil kā be-roġhan charāġh

jalwa-gar fanus-e-tan mein hai hamara man charagh

be-bati aur tel ye hai roz o shab raushan charagh

ta-abad is ko nahin baad-e-muKHalif se KHatar

hai hamare hath par be-parda-e-daman charagh

aaj ki shab lutf hai sair-e-chaman ai 'andalib

roghan-e-gul se hua hai har gul-e-gulshan charagh

Dar nahin majnun ko phirne ka shab-e-hijran ke bich

haq mein us ke dida-e-ahu hue ban ban charagh

yak nazar us ki dil-e-mushtaq hai jin ne ki aaj

ek jalwe mein kiya hai KHana-e-darpan charagh

jab se hai raushan dilon ke dil pe 'hatim' ki nigah

tab se raushan hai ga us ke dil ka be-roghan charagh