jalwa paband-e-tur hai ab tak

jalva pāband-e-tūr hai ab tak

dil vahī koh-e-nūr hai ab tak

ziist se kam nahīñ ḳhushī lekin

ġham matā.a-e-shu.ūr hai ab tak

fāsla bas nishāt-o-ġham kā hai

vo qarīñ hai na duur hai ab tak

mai-kashī kā agar salīqa ho

ġham meñ kaif-o-surūr hai ab tak

dil kī chaukhaT pe hai ġhamoñ kī bhiiḌ

dil meñ koī zarūr hai ab tak

din kā sūraj to Dhal gayā kab kā

zikr-e-ruḳhsār-e-hūr hai ab tak

har pas-e-ruḳh hai ik ruḳh-e-raushan

zindagī kā zuhūr hai ab tak

ye tirā munkasir-mizāj 'kalīm'

banda-e-pur-ġhayūr hai ab tak

jalwa paband-e-tur hai ab tak

dil wahi koh-e-nur hai ab tak

zist se kam nahin KHushi lekin

gham mataa-e-shuur hai ab tak

fasla bas nishat-o-gham ka hai

wo qarin hai na dur hai ab tak

mai-kashi ka agar saliqa ho

gham mein kaif-o-surur hai ab tak

dil ki chaukhaT pe hai ghamon ki bhiD

dil mein koi zarur hai ab tak

din ka suraj to Dhal gaya kab ka

zikr-e-ruKHsar-e-hur hai ab tak

har pas-e-ruKH hai ek ruKH-e-raushan

zindagi ka zuhur hai ab tak

ye tera munkasir-mizaj 'kalim'

banda-e-pur-ghayur hai ab tak