jalwe hon ru-ba-ru to tamasha kare koi

jalve hoñ rū-ba-rū to tamāshā kare koī

jab kuchh nazar na aa.e to phir kyā kare koī

husn-e-latīf kyoñ ho asīr-e-nigāh-e-shauq

ham ḳhud ye chāhte haiñ ki pardā kare koī

sad.hā hijāb-hā-e-ta.ayyun ke bāvajūd

vo kyā kareñ jo un kī tamannā kare koī

tharrā ke rah ga.ī hai mirī kā.enāt-e-hosh

aise bhī sāmne se na guzrā kare koī

kis kis se rāh-e-dost meñ dāman chhuḌā.īye

har zarra chāhtā hai ki sajda kare koī

har qalb muztarib hai magar un kī maslahat

duniyā ḳharāb-e-ġham hai magar kyā kare koī

merī nigāh-e-shauq se is bazm-e-nāz meñ

vo husn aa rahā hai ki dekhā kare koī

dil āshnā-e-ġham ho to ai 'kaif' bazm-e-dahr

aisā nigār-ḳhāna hai dekhā kare koī

jalwe hon ru-ba-ru to tamasha kare koi

jab kuchh nazar na aae to phir kya kare koi

husn-e-latif kyon ho asir-e-nigah-e-shauq

hum KHud ye chahte hain ki parda kare koi

sadha hijab-ha-e-tayyun ke bawajud

wo kya karen jo un ki tamanna kare koi

tharra ke rah gai hai meri kaenat-e-hosh

aise bhi samne se na guzra kare koi

kis kis se rah-e-dost mein daman chhuDaiye

har zarra chahta hai ki sajda kare koi

har qalb muztarib hai magar un ki maslahat

duniya KHarab-e-gham hai magar kya kare koi

meri nigah-e-shauq se is bazm-e-naz mein

wo husn aa raha hai ki dekha kare koi

dil aashna-e-gham ho to ai 'kaif' bazm-e-dahr

aisa nigar-KHana hai dekha kare koi