jalwe jalwe ka naya andaz hai

jalve jalve kā nayā andāz hai

har taraf ik dilrubā e.ajāz hai

ruuh par ik kaif-e-soz-o-sāz hai

dil meñ koī yuuñ navā-parvāz hai

ishq ke naġhmoñ kā ye e.ajāz hai

har sadā merī tirī āvāz hai

dil meñ bhar dī kis ne ye barq-e-navā

naġhma naġhma par vo soz-e-sāz hai

āstān-e-gul kabhī chhuTtā nahīñ

ab qafas hai hasrat-e-parvāz hai

ibtidā bhī intihā bhī shauq hai

kyā mirā anjām kyā āġhāz hai

ḳhud badal Daalo mizāj-e-jism-o-jāñ

jab havā-e-zindagī nā-sāz hai

kis ko 'ārif' hosh-e-ādāb-e-niyāz

sāmne jab vo harīm-e-nāz hai

jalwe jalwe ka naya andaz hai

har taraf ek dilruba eajaz hai

ruh par ek kaif-e-soz-o-saz hai

dil mein koi yun nawa-parwaz hai

ishq ke naghmon ka ye eajaz hai

har sada meri teri aawaz hai

dil mein bhar di kis ne ye barq-e-nawa

naghma naghma par wo soz-e-saz hai

aastan-e-gul kabhi chhuTta nahin

ab qafas hai hasrat-e-parwaz hai

ibtida bhi intiha bhi shauq hai

kya mera anjam kya aaghaz hai

KHud badal Dalo mizaj-e-jism-o-jaan

jab hawa-e-zindagi na-saz hai

kis ko 'arif' hosh-e-adab-e-niyaz

samne jab wo harim-e-naz hai