jashn hum yun bhi manaen der tak

jashn ham yuuñ bhī manā.eñ der tak

aaj kī shab ḳhud se uljheñ der tak

sāthiyoñ meñ jab farāsat hī nahīñ

ik pahelī kyā bujhā.eñ der tak

guftugū kā ik tarīqa ye bhī hai

aao ham ḳhāmosh baiTheñ der tak

ye tumhāre zulm kī tauhīn hai

shahr meñ chīḳheñ na gūñjeñ der tak

raat kī bāñheñ hameñ bhīñche rahīñ

aur phir ham ḳhud ko socheñ der tak

ham ḳhud apne ḳhvāb kī ta.abīr haiñ

aa.ina phir kyuuñ na dekheñ der tak

rāh-gīroñ ke liye phailī rahīñ

būḌhe bargad terī shāḳheñ der tak

jashn hum yun bhi manaen der tak

aaj ki shab KHud se uljhen der tak

sathiyon mein jab farasat hi nahin

ek paheli kya bujhaen der tak

guftugu ka ek tariqa ye bhi hai

aao hum KHamosh baiThen der tak

ye tumhaare zulm ki tauhin hai

shahr mein chiKHen na gunjen der tak

raat ki banhen hamein bhinche rahin

aur phir hum KHud ko sochen der tak

hum KHud apne KHwab ki tabir hain

aaina phir kyun na dekhen der tak

rah-giron ke liye phaili rahin

buDhe bargad teri shaKHen der tak