jauhar nahin hamare hain sayyaad par khule

jauhar nahīñ hamāre haiñ sayyād par khule

le kar qafas ko uḌ ga.e rakkhā jo par khule

shīshe sharāb ke raheñ āThoñ pahar khule

aisā ghire ki phir na kabhī abr-e-tar khule

kuchh to hameñ haqīqat-e-shams-o-qamar khule

kis kaj-kulah ke ishq meñ phirte haiñ sar khule

insāf ko haiñ dīda-e-ahl-e-nazar khule

parda uThā ki parda-e-shams-o-qamar khule

rañgrez kī dukāñ meñ bhare huuñ hazār rañg

turra vo hai jo yaar kī dastār par khule

kyā chiiz hai ibārat-e-rañgīñ meñ sharh-e-shauq

ḳhat kī tarah tabī.at-e-basta agar khule

jo chāheñ yaar se kahīñ aġhyār ġham nahīñ

ḳhvāja ko haiñ ġhulām ke aib-o-hunar khule

haivāñ par aadmī ko sharaf nutq se huā

shukr-e-ḳhudā kare jo zabān-e-bashar khule

yūsuf kī ik dukāñ meñ na tū ne talāsh kī

bāzār kaun kaun se ai be-ḳhabar khule

shīrīñ-dahan se tere ta.ajjub hai guftugū

e.ajāz hai agar girah-e-naishakar khule

kaT jaa.e vo zabāñ na ho jis se duā-e-ḳhair

phūTe vo aañkh jo ki na vaqt-e-sahar khule

kotah hai is qadar mire qad par ridā-e-aish

Dhāñkūñ jo paañv ko to yaqīñ hai ki sar khule

qātil jazā-e-ḳhair mile terī teġh ko

zaḳhmoñ ke muñh khule nahīñ jannat ke dar khule

fasl-e-bahār aa.ī hai chaltā hai daur-e-jām

muġh kī dukān shaam khule yā sahar khule

pā-posh ham ne maarī hai dastār-o-tāj par

saudā-e-zulf-e-yār meñ rahte haiñ sar khule

kaif-e-sharāb-e-nāb kā anjām ho ba-ḳhair

shalvār-band sāqī-e-rashk-e-qamar khule

nā-ḳhvāñda sharh-e-shauq jalā.e ga.e ḳhutūt

bāñdhe ga.e vo jo ki mire nāma-bar khule

chāhe safā tū saath tahārat ke zikr kar

parhez kar to tujh ko davā kā asar khule

hañs kar dikhā.e daañt jo ham ko to kyā huā

le lījiye jo qīmat-e-silk-e-guhar khule

kahtā huuñ rāz-e-ishq magar saath shart ke

kānoñ hī tak rahe na zabāñ ko ḳhabar khule

mushtāq bandishoñ ke haiñ ḳhvāboñ ko chāhiye

bañdhvā.eñ shā.eroñ se jo un kī kamar khule

ruktī na us se choT na chaltī ye qātilā

hāthoñ se tere jauhar-e-teġh-o-sipar khule

matlab na sarnavisht kā samjhā tū shukr kar

dīvāna ho jo hāl-e-qazā-o-qadar khule

chalnā paḌegā yaar kī ḳhidmat meñ sar ke bal

samjhe ho kyā jo baiThe ho 'ātish' kamar khule

jauhar nahin hamare hain sayyaad par khule

le kar qafas ko uD gae rakkha jo par khule

shishe sharab ke rahen aaThon pahar khule

aisa ghire ki phir na kabhi abr-e-tar khule

kuchh to hamein haqiqat-e-shams-o-qamar khule

kis kaj-kulah ke ishq mein phirte hain sar khule

insaf ko hain dida-e-ahl-e-nazar khule

parda uTha ki parda-e-shams-o-qamar khule

rangrez ki dukan mein bhare hun hazar rang

turra wo hai jo yar ki dastar par khule

kya chiz hai ibarat-e-rangin mein sharh-e-shauq

KHat ki tarah tabiat-e-basta agar khule

jo chahen yar se kahin aghyar gham nahin

KHwaja ko hain ghulam ke aib-o-hunar khule

haiwan par aadmi ko sharaf nutq se hua

shukr-e-KHuda kare jo zaban-e-bashar khule

yusuf ki ek dukan mein na tu ne talash ki

bazar kaun kaun se ai be-KHabar khule

shirin-dahan se tere tajjub hai guftugu

eajaz hai agar girah-e-naishakar khule

kaT jae wo zaban na ho jis se dua-e-KHair

phuTe wo aankh jo ki na waqt-e-sahar khule

kotah hai is qadar mere qad par rida-e-aish

Dhankun jo panw ko to yaqin hai ki sar khule

qatil jaza-e-KHair mile teri tegh ko

zaKHmon ke munh khule nahin jannat ke dar khule

fasl-e-bahaar aai hai chalta hai daur-e-jam

mugh ki dukan sham khule ya sahar khule

pa-posh hum ne mari hai dastar-o-taj par

sauda-e-zulf-e-yar mein rahte hain sar khule

kaif-e-sharab-e-nab ka anjam ho ba-KHair

shalwar-band saqi-e-rashk-e-qamar khule

na-KHwanda sharh-e-shauq jalae gae KHutut

bandhe gae wo jo ki mere nama-bar khule

chahe safa tu sath tahaarat ke zikr kar

parhez kar to tujh ko dawa ka asar khule

hans kar dikhae dant jo hum ko to kya hua

le lijiye jo qimat-e-silk-e-guhar khule

kahta hun raaz-e-ishq magar sath shart ke

kanon hi tak rahe na zaban ko KHabar khule

mushtaq bandishon ke hain KHwabon ko chahiye

bandhwaen shaeron se jo un ki kamar khule

rukti na us se choT na chalti ye qatila

hathon se tere jauhar-e-tegh-o-sipar khule

matlab na sarnawisht ka samjha tu shukr kar

diwana ho jo haal-e-qaza-o-qadar khule

chalna paDega yar ki KHidmat mein sar ke bal

samjhe ho kya jo baiThe ho 'atish' kamar khule