jawab mangta tha main sawal de diya gaya

javāb māñgtā thā maiñ savāl de diyā gayā

talāsh dar talāsh kā vabāl de diyā gayā

atā huā thā jab yaqīñ kī sabz vādiyoñ meñ ghar

to kyuuñ dar-e-gumāñ pas-e-ḳhayāl de diyā gayā

mirī zamīn-e-chashm-e-nam meñ ḳhvāb bo diye ga.e

mujhe ḳhamīr-e-shauq lā-zavāl de diyā gayā

havāoñ ko dayār-e-dil kī raat sauñp dī ga.ī

badan ko sham-e-nā-tavāñ kā haal de diyā gayā

tumhāre ba.ad daulat-e-ġham-e-jahān mil ga.ī

duā qubūl ho ga.ī malāl de diyā gayā

nasīb-var tumheñ to tauq-e-hasrat-e-fanā milā

hameñ to ḳhauf-e-lamha-e-visāl de diyā gayā

ye dāstān-e-tifl-e-nai savār-e-raḳhsh-e-āgahī

kamāl phir zavāl phir kamāl de diyā gayā

jawab mangta tha main sawal de diya gaya

talash dar talash ka wabaal de diya gaya

ata hua tha jab yaqin ki sabz wadiyon mein ghar

to kyun dar-e-guman pas-e-KHayal de diya gaya

meri zamin-e-chashm-e-nam mein KHwab bo diye gae

mujhe KHamir-e-shauq la-zawal de diya gaya

hawaon ko dayar-e-dil ki raat saunp di gai

badan ko sham-e-na-tawan ka haal de diya gaya

tumhaare baad daulat-e-gham-e-jahan mil gai

dua qubul ho gai malal de diya gaya

nasib-war tumhein to tauq-e-hasrat-e-fana mila

hamein to KHauf-e-lamha-e-visal de diya gaya

ye dastan-e-tifl-e-nai sawar-e-raKHsh-e-agahi

kamal phir zawal phir kamal de diya gaya