jawan tha dil na tha andesha-e-sud-o-ziyan pahle

javāñ thā dil na thā andesha-e-sūd-o-ziyāñ pahle

vo the kyā mehrbāñ saarā jahāñ thā mehrbāñ pahle

koī manzil ho himmat chāhiye sar ho hī jaatī hai

magar luTte haiñ raste meñ hazāroñ kārvāñ pahle

vo mīr-e-kārvāñ bhī ik na ik din ho ke rahte haiñ

jinhoñ ne muddatoñ chhānī hai ḳhāk-e-kārvāñ pahle

ḳhudī jaagī uThe parde ujāgar ho ga.iiñ rāheñ

nazar kotāh thī tārīk thā saarā jahāñ pahle

vahī barq-e-tajallī sham.a hai mere shabistāñ kī

na lā saktī thī jis kī taab shāḳh-e-āshiyāñ pahle

huuñ ab bhī pā-ba-gil tāham bahut parvāz kī maiñ ne

vo ab merī zamīñ hai thā jo merā āsmāñ pahle

nihāñ thiiñ dar-ba-dar kī Thokaroñ meñ azmateñ 'jāmī'

na thā is darja aa.alī terā andāz-e-bayāñ pahle

jawan tha dil na tha andesha-e-sud-o-ziyan pahle

wo the kya mehrban sara jahan tha mehrban pahle

koi manzil ho himmat chahiye sar ho hi jati hai

magar luTte hain raste mein hazaron karwan pahle

wo mir-e-karwan bhi ek na ek din ho ke rahte hain

jinhon ne muddaton chhani hai KHak-e-karwan pahle

KHudi jagi uThe parde ujagar ho gain rahen

nazar kotah thi tarik tha sara jahan pahle

wahi barq-e-tajalli shama hai mere shabistan ki

na la sakti thi jis ki tab shaKH-e-ashiyan pahle

hun ab bhi pa-ba-gil taham bahut parwaz ki main ne

wo ab meri zamin hai tha jo mera aasman pahle

nihan thin dar-ba-dar ki Thokaron mein azmaten 'jami'

na tha is darja aaali tera andaz-e-bayan pahle