jazba-e-dil ko amal mein kabhi lao to sahi

jazba-e-dil ko amal meñ kabhī laao to sahī

apnī manzil kī taraf paañv baḌhāo to sahī

zindagī vo jo harīf-e-ġham-e-ayyām rahe

dil shikasta hai to kyā saaz uThāo to sahī

jaag uTThegī ye soī huī duniyā lekin

pahle ḳhvābīda tamannā ko jagāo to sahī

phuul hī phuul haiñ kahte ho jinheñ tum kāñTe

merī duniyā-e-junūñ meñ kabhī aao to sahī

tumheñ ābād nazar aa.egī ujḌī duniyā

dil kī duniyā ko mohabbat se basāo to sahī

zindagī phir se javāñ phir se hasīñ ho jaa.e

un kī āñkhoñ se zarā aañkh milāo to sahī

karte phirte ho añdhere kī shikāyat 'darshan'

dil kī duniyā meñ koī diip jalāo to sahī

jazba-e-dil ko amal mein kabhi lao to sahi

apni manzil ki taraf panw baDhao to sahi

zindagi wo jo harif-e-gham-e-ayyam rahe

dil shikasta hai to kya saz uThao to sahi

jag uTThegi ye soi hui duniya lekin

pahle KHwabida tamanna ko jagao to sahi

phul hi phul hain kahte ho jinhen tum kanTe

meri duniya-e-junun mein kabhi aao to sahi

tumhein aabaad nazar aaegi ujDi duniya

dil ki duniya ko mohabbat se basao to sahi

zindagi phir se jawan phir se hasin ho jae

un ki aankhon se zara aankh milao to sahi

karte phirte ho andhere ki shikayat 'darshan'

dil ki duniya mein koi dip jalao to sahi