jazba-e-hamsari har ruKH se ayan hota hai

jazba-e-hamsarī har ruḳh se ayaañ hotā hai

terī mahfil meñ jahāñ merā bayāñ hotā hai

aa.ina hotā hai jab mere muqābil ai dost

terī sūrat tirā ruḳh us se ayaañ hotā hai

ik hasīñ phuul kā paikar hai suhānī shab hai

phir mire siine meñ ik dard javāñ hotā hai

dekhnā jānib-e-gul-zār zarā ahl-e-qafas

baat kyā hai ye udhar kaisā dhuāñ hotā hai

maiñ tirā aa.ina huuñ tū hai mirā aks-e-hasīñ

zarre-zarre se tirā jalva ayaañ hotā hai

mere dil meñ hai vahīñ maskan-e-yād-e-ġham-dost

Tīseñ uThtī haiñ jahāñ dard jahāñ hotā hai

rāh-e-ulfat kā tasavvur bhī kabhī ai 'rāje'

ahl-e-dānish ke liye bār-e-garāñ hotā hai

jazba-e-hamsari har ruKH se ayan hota hai

teri mahfil mein jahan mera bayan hota hai

aaina hota hai jab mere muqabil ai dost

teri surat tera ruKH us se ayan hota hai

ek hasin phul ka paikar hai suhani shab hai

phir mere sine mein ek dard jawan hota hai

dekhna jaanib-e-gul-zar zara ahl-e-qafas

baat kya hai ye udhar kaisa dhuan hota hai

main tera aaina hun tu hai mera aks-e-hasin

zarre-zarre se tera jalwa ayan hota hai

mere dil mein hai wahin maskan-e-yaad-e-gham-dost

Tisen uThti hain jahan dard jahan hota hai

rah-e-ulfat ka tasawwur bhi kabhi ai 'raje'

ahl-e-danish ke liye bar-e-garan hota hai